Awgrymiadau Ymarfer: Ymarferwyr yn Mynychu Cynadleddau Amddiffyn Plant - Negeseuon Allweddol
- Mae paratoi yn allweddol. Dylai ymarferwyr baratoi crynodeb o’u hadroddiad sydd sy’n canolbwyntio ar y pwyntiau allweddol y dymunant eu gwneud yn y gynhadledd. Dylent ddefnyddio tystiolaeth a sicrhau ffocws ar y plentyn wrth gyflwyno’r crynodeb.
- Mae ffocws deublyg i’r gynhadledd. Yn gyntaf, gwneud synnwyr o’r wybodaeth ac yn ail, creu cynllun amlinellol i fynd i’r afael â’r pryderon.
- Yn ganolog i ddealltwriaeth o lefel y risg sydd o niwed y mae dealltwriaeth gadarn o brofiad bywyd dyddiol y plentyn/plant a’u gofalwr/wyr.
- Mae pob plentyn yn unigryw ac felly bydd ei anghenion yn benodol i’r plentyn hwnnw. Mae’n bwysig felly fod pob plentyn yn cael ei ystyried ar wahân.
- Mae cyfrifoldeb ar bob rhiant i gadw’r plentyn yn ddiogel. Dylid ystyried ei rôl a’i gyfrifoldebau ar wahân.
- Caiff asesiadau proffesiynol ynghylch pryderon diogelu a chryfderau teuluol eu hystyried. Sicrhewch eich bod yn gallu cyfiawnhau eich asesiad o’ch pryderon ac unrhyw gryfderau gyda thystiolaeth.
- Byddwch yn barod i gael trafodaeth agored am bryderon proffesiynol a chryfderau teuluol ac i gymryd rhan yn y trafodaethau hyn.
- Wrth ddrafftio’r cynllun amlinellol peidiwch â chanolbwyntio ar gamau gweithredu yn unig. Ystyriwch y camau yn eu cyd-destun. Pa anghenion sydd angen i ni fynd i’r afael â hwy? Pa gamau all fynd i’r afael â’r rhain a pham? Sut byddwn ni’n gwybod a yw’r camau yn effeithiol o ran deilliannau sy’n canolbwyntio ar y plentyn?
- Gall canolbwyntio yn unig ar bryderon yn y gynhadledd danseilio gofalwyr a llesteirio newid. Felly, sicrhewch eich bod yn cydnabod cryfderau teuluol a nodi sut gellir datblygu’r rhain i wella profiad byw dyddiol y plentyn/plant.