Y broses benderfynu yn ystod cynhadledd amddiffyn plant gychwynnol

CRYNHOI GWYBODAETH AM RISG O NIWED SYLWEDDOL

Ystyriwch: beth rydym yn ei wybod am achos y niwed a'r effaith ar y plentyn?

Beth yw ein pryderon ynghylch capasiti rhianta, ffactorau teuluol ac amgylcheddol?

Beth rydym yn ei wybod am ffactorau amddiffynol a chyrfderau teuluol?

GWNEUD SENSE O'R WYBODAETH I SEFYDLU PAM MAE ARFERION YN CAEL EU CADW

Ystyriwch: a yw risg o niwed a phryderon ynghylch gallu rhianta yn gorbwyso cryfderau teulu a ffactorau amddiffynnol?

GWNEUD PENDERFYNIAD

Yn ol ein barn fel ymarferwyr a ywr plentyn yn wynebu risg parhaus o niwed?

Os ydyw, ystyriwch gofrestriad

Os nad ydyw a oes angen cynllun cymorth?

COFRESTRU

Ystyriwch: pa gategori/ïau sy'n disgrifio'r risg parhaus o niwed orau?

DATBLYGU CYNLLUN AMDDIFFYN GOFAL A CHYMORTH

Ystyriwch: beth sydd angen ei newid?

Beth mae'n rhaid i rieni ei wneud?

Sut gall ymarferwyr hwyluso a chefnogi newid?

Pwy ddylai fod yn y grŵp craidd?

Dylai ymarferwyr sy’n cyfrannu at y gynhadledd bennu’r canlynol yn seiliedig ar y dystiolaeth sydd ar gael:

• A yw’r plentyn mewn risg barhaol o niwed sylweddol?

ac

• a oes angen ymyrraeth amlasiantaeth drwy gyfrwng cynllun amddiffyn, gofal a chymorth swyddogol a chofrestru’r plentyn ar y gofrestr amddiffyn plant.

Mewn achosion o’r fath, dylid ystyried y canlynol er mwyn pennu hynny:

• Y gellir dangos bod y plentyn wedi dioddef camdriniaeth neu amhariad o ran ei iechyd neu ddatblygiad yn sgil cam-drin corfforol, emosiynol, seicolegol, ariannol neu rywiol, neu esgeulustod, ac mae ymarferwyr o’r farn bod camdriniaeth neu amhariad pellach yn debygol;

neu

• mae’r ymarferwyr o’r farn, ar sail canfyddiadau’r ymchwiliadau i’r achos unigol hwn neu drwy dynnu ar dystiolaeth ymchwil, bod y plentyn yn debygol o ddioddef camdriniaeth neu amhariad o ran ei les neu ddatblygiad yn sgil cam-drin corfforol, emosiynol, seicolegol, ariannol neu rywiol, neu esgeulustod.

Rhaid ystyried barn y plentyn a’r teulu o ran y risg o niwed ac mae’n rhaid cymryd eu barn i ystyriaeth, ond yr ymarferwyr yn y gynhadledd fydd yn gwneud un o’r penderfyniadau canlynol:

Wrth wneud y penderfyniadau hyn, mae’n rhaid i’r ymarferwyr gydnabod:

• bod angen canolbwyntio ar y risg gwirioneddol, tebygol a/neu barhaus o niwed sylweddol;
• dylid gwneud penderfyniad ar wahân ar gyfer pob plentyn yn y teulu, gan ystyried y niwed y mae’n ei ddioddef neu’n debygol o’i ddioddef, a’r effaith ar ei iechyd a’i ddatblygiad;
• mae ymarferwyr sy’n bresennol mewn cynhadledd yn rhan o’r broses benderfynu ac ni chânt wrthod eu cyfrifoldeb;
• gofynnir i bawb sy’n mynd i’r gynhadledd ac sy’n clywed y wybodaeth a roddir i gyflwyno barn ar gofrestru ar gyfer pob un o’r plant sy’n cael ei drafod.

Penderfyniad y gynhadledd 1: Nid yw’r plentyn mewn perygl parhaus o niwed, ond gallai fod ganddo anghenion gofal a chymorth

Os bydd pob partner yn cytuno ar y penderfyniad hwn, dylid annog y rhieni i barhau â’r asesiad llesiant dan Ran 3 Deddf Gwasanaethau Cymdeithasol a Llesiant (Cymru) 2014 i bennu pa ofal a chymorth gallai helpu i hyrwyddo llesiant y plentyn orau.

Penderfyniad y gynhadledd 2: Caiff y plentyn sy’n dioddef niwed neu sydd mewn perygl o niwed ei roi ar y gofrestr ac mae’n destun cynllun amddiffyn gofal a chymorth

Dylai cynllun amddiffyn, gofal a chymorth ddilyn y gofynion a nodir dan Ran 4 Adran 54 Deddf Gofal Cymdeithasol a Llesiant (Cymru )2014.

Yn ogystal â’r gofynion dan Ran 4, nod y cynllun yn gyffredinol yw:

• Sicrhau bod y plentyn yn ddiogel a’i atal rhag dioddef rhagor o niwed;
• hyrwyddo llesiant a datblygiad y plentyn;
• Helpu’r teulu ac aelodau ehangach y teulu i ddiogelu a hyrwyddo llesiant eu plentyn, ar yr amod bod gwneud hynny er budd gorau’r plentyn;
• Disgrifio anghenion datblygiadol y plentyn a nodwyd a’r gwasanaeth sydd eu hangen;
• cynnwys canlyniadau penodol y gellir eu cyflawni sy’n canolbwyntio ar y plentyn er mwyn diogelu a hyrwyddo llesiant y plentyn;
• Cynnwys strategaethau realistig a chamau gweithredu penodol er mwyn cyflawni canlyniadau a gynlluniwyd;
• nodi’n glir rolau a chyfrifoldebau ymarferwyr ac aelodau’r teulu, gan gynnwys natur ac amlder cysylltiad ymarferwyr â phlant ac aelodau’r teulu;
• Pennu adegau pan gaiff cynnydd ei adolygu, a’r ffordd y caiff cynnydd ei farnu;
• Nodi’n glir rolau a chyfrifoldebau’r ymarferwyr hynny sydd mewn cysylltiad rheolaidd â’r plentyn, er enghraifft, ymwelwyr iechyd, meddygon teulu ac athrawon, yn ogystal ag unrhyw gymorth wedi ei dargedu neu gymorth arbenigol i’r plentyn a’r teulu.

Dod i benderfyniad

Dylai’r gwaith o ddadansoddi a gwneud synnwyr o’r wybodaeth sy’n cael ei rhannu yn y gynhadledd lywio’r broses penderfynu yn ogystal â bod yn sail ar gyfer cynllunio ar gyfer dyfodol y plentyn.

Dylai’r gynhadledd ddilyn proses strwythuredig er mwyn dod i benderfyniad o ran a ddylid rhoi enw’r plentyn ar y gofrestr amddiffyn plant.

Dylai’r broses fod fel a ganlyn:

• Rhannu gwybodaeth yn seiliedig ar yr adroddiadau ysgrifenedig a geir gan y rhai sy’n bresennol a’r rhai nad oeddynt yn gallu dod i’r gynhadledd;
• trafod y perygl o niwed sylweddol, profiadau aelodau’r teulu, eu dymuniadau a’u teimladau a’r hyn y hoffent weld yn newid;
• dylai’r cadeirydd sicrhau bod y wybodaeth a rennir yn canolbwyntio ar y plentyn ac yn berthnasol. Gallai treulio gormod o amser ar y rhan hon o’r broses effeithio’n negyddol ar y broses dadansoddi, penderfynu a chynllunio;
• dylai cadeirydd y gynhadledd grynhoi’r drafodaeth yn seiliedig ar y ffeithiau a gyflwynwyd yn y gynhadledd a sicrhau bod aelodau’r gynhadledd yn cytuno bod y crynodeb yn gywir;
• dylai’r cadeirydd ofyn i bob aelod o’r gynhadledd am ei farn ar y risgiau i’r plentyn a’r angen am gynllun amddiffyn, gofal a chymorth, gan gynnwys cynnwys arfaethedig cynllun o’r fath o ran y risgiau sydd angen mynd i’r afael â nhw;
• gweithredu dull yn seiliedig ar gryfderau drwy gydol y broses.

Ni ddylid caniatáu i’r drafodaeth yn y gynhadledd ganolbwyntio ar gofrestru’n unig. Dylid rhoi amser a sylw i lunio cynllun amddiffyn gofal a chymorth os oes angen.

Dylai pob person yn y gynhadledd ac eithrio aelodau’r teulu neu’r bobl sydd yn y gynhadledd fel cymorth i’r rhieni, fynegi ei farn ar yr angen am gynllun gofal, cymorth ac amddiffyn ac am gofrestru’r plentyn. Ni fyddai disgwyl i aelodau CAFCASS Cymru fynegi barn ar gofrestru fel arfer. Dylid gofyn am farn rhieni, plant (lle bo’n briodol) ac aelodau’r teulu hefyd, ond yr ymarferwyr fyddai’n gyfrifol am wneud y penderfyniad terfynol.

Awgrymiadau Ymarfer: Ymarferwyr yn Mynychu Cynadleddau Amddiffyn Plant - Negeseuon Allweddol

Gwneud penderfyniadau yn ystod cynadleddau amddiffyn plant pan na cheir consensws

Mewn nifer o gynadleddau bydd consensws o blaid neu yn erbyn cofrestru a chategori/categorïau’r cofrestru. Os nad oes cytundeb:

• dylai’r cadeirydd geisio datrysiad, er enghraifft, drwy ail-grynhoi’r materion a’r risgiau ac annog trafodaethau pellach;
• mae angen i’r cadeirydd sicrhau bod barn pob asiantaeth wedi ei cheisio.
• dylid osgoi pleidleisio fel y cyfryw. Fodd bynnag, os na fydd modd cael consensws o hyd, dylai’r penderfyniad ar gofrestru fynd i bleidlais. Dylai’r pleidleisiau fod yn seiliedig ar asiantaethau a/neu grwpiau o ymarferwyr, ac nid ar unigolion. Dylai’r cadeirydd nodi’r grwpiau ymarferwyr perthnasol o fewn asiantaethau yn glir mewn perthynas â phleidleisio. Dylai staff uwch o bob asiantaeth helpu’r broses hon a sicrhau bod cyn lleied o grwpiau o ymarferwyr â phosibl;
• dylid gofyn i bob unigolyn enwebedig neu arweinydd pob asiantaeth/grŵp ymarferwyr roi barn ar gofrestru;
• os nad oes consensws, ond mae barn fwyafrifol, bydd y cadeirydd yn derbyn barn y mwyafrif, hyd yn oed os bydd yn anghytuno â hynny. Os bydd y cadeirydd yn credu bod y penderfyniad yn rhoi’r plentyn mewn risg, rhaid iddo drafod ei bryder â’r uwch reolwr â chyfrifoldeb dros ddiogelu ar unwaith;
• mewn amgylchiadau lle mae aelodau’n parhau i fod wedi’u rhannu 50/50, y cadeirydd fydd yn penderfynu ar gofrestru’r plentyn ai peidio.

Dylai cofnodion y gynhadledd adlewyrchu’r farn wahanol a fynegir yn y gynhadledd, gan gynnwys unrhyw bryderon sydd gan y cadeirydd ynghylch pa mor addas yw’r penderfyniad.

Os bydd y diffyg consensws yn ymwneud â gwahaniaethau rhwng ymarferwyr, mae’n bosibl y bydd angen defnyddio datrysiad gwahaniaethau proffesiynol y Bwrdd Diogelu Rhanbarthol yn hwyrach.

Dylai grwpiau o gynrychiolwyr asiantaeth gael ei drefnu gan y Byrddau Diogelu Rhanbarthol.

Gohirio penderfyniad mewn cynhadledd amddiffyn plant

Nid yw gohirio penderfyniad am gofrestru yn arfer da mewn cynhadledd amddiffyn plant.

Fodd bynnag, gall fod yn fwy addas gohirio galw cynhadledd amddiffyn plant gychwynnol os na fydd prif elfennau’r wybodaeth ar gael er mwyn gallu gwneud penderfyniad gwybodus ynghylch y risg i’r plentyn a phenderfynu a ddylid rhoi enw’r plentyn ar y gofrestr.

Os oes digon o wybodaeth y gellir seilio’r penderfyniad arni, mae’n debygol y bydd y gynhadledd yn penderfynu peidio â rhoi enw’r plentyn ar y gofrestr, ac yn argymell y dylid cwblhau’r asesiad cymesurol a dylid rhoi gwybodaeth fwy clir ynghylch y plentyn a’r teulu.

Rhaid i’r gynhadledd, a’r cadeirydd yn arbennig, fod yn fodlon nad oes unrhyw arwyddion amlwg o risg i’r plentyn ar unwaith. Dylid pennu’r dyddiad ar gyfer y gynhadledd amddiffyn plant nesaf.