Mae hwn yn faes gwaith sy’n cael ei gefnogi orau gan waith rhyngasiantaethol cadarn a thrafodaeth broffesiynol. Gall fod yn heriol pan mae ymholiadau amddiffyn plant neu ddiogelu oedolion wedi cael eu gwneud mewn un ardal, ond bod yr unigolyn y gwnaed yr honiad amdano’n byw neu’n gweithio mewn ardal arall. Mae angen trafodaeth broffesiynol glir a phriodol mewn perthynas â’r amgylchiadau hyn.
Dylid gwneud penderfyniadau hefyd o ran cyfeirio achosion at Awdurdodau Lleol eraill os oes gan yr unigolyn blant neu gyfrifoldebau gofalu mewn ardal arall.
Bydd angen rhannu gwybodaeth rhwng ardaloedd awdurdodau lleol. Rhaid i Swyddog Dynodedig yr Awdurdod Lleol/Swyddog Dynodedig Diogelu sicrhau ei fod yn rhannu’r holl wybodaeth â’i swyddog cyfatebol yn yr awdurdodau Lleol eraill.
Fel arfer, cyfrifoldeb yr Awdurdod Lleol lle digwyddodd y cam-drin/digwyddiad honedig yw cynnal Cyfarfod/Trafodaeth Strategaeth Adran 5. Ar ôl trafodaeth rhwng Swyddog Dynodedig yr Awdurdod Lleol/Swyddog Dynodedig Diogelu perthnasol, penderfynir a chofnodi pa awdurdod fydd yn gyfrifol am gynnal Cyfarfod Strategaeth Adran 5 a’r rhesymau dros wneud hynny. Dylai hyn gael ei ategu gan gyfathrebu a thrafodaeth broffesiynol gadarnhaol.
Os na ellir dod i gonsensws ynghylch pa ardal Awdurdod Lleol fydd yn bwrw ymlaen â hyn, bydd angen uwchgyfeirio hyn i Swyddog Dynodedig yr Awdurdod Lleol neu uwch reolwr arall yn y Gwasanaethau Cymdeithasol.
Os oes materion sy’n ymwneud â diffyg ymateb neu anghysondeb â’r meini prawf trothwy ar gyfer y gweithdrefnau hyn, rhaid i ymarferwyr uwchgyfeirio’r rhain i’w harweinwyr diogelu a defnyddio protocolau perthnasol y bwrdd rhanbarthol h.y. Protocol Datrys Gwahaniaethau Proffesiynol.